Monday, 11 February 2013

LIFE...!!!!





my site
http://stolenseconds.com


Zindgi kab kya modd le le, hum nahi jante. Kab kis mukaam pe kisse milwade, ye to sapne me bhi nahi socha ja sakta. Ravi or Rohan ne bhi nahi socha tha. Wo bas jiye ja rahe the apni apni zindgiyan. Ravi or Rohan, kabhi mile nahi the ek dusre se, par aaj wo milne wale the………… the…….

Rohan…………
Bada hi shararati tha bachpan se. Hona bhi tha. Apne maa-baba ki iklauti santaan tha. Sabka ladla. Natijan bada hote hote bigad jana, uski galti nahi thi. School ki shikayate, college ki mastiya sab beet chuki thi. Or beete waqt ke sath Rohan bhi badal chuka tha. Ab wo kuch banna chahta tha, kuch karna chahta tha. Bas ek mauke ki talaash me tha. Aaj uske office me koi deal honi thi. Or shayad ye uske promotion ka zariya bhi ho sakta tha. Agar aaj uska promotion ho jayega to Rohan ke sare to nahi, par kuch sapne zaroor pure ho jayenge. Wo maa-baba ka aashirwad le kar nikal padha. Maa-baba apne is bete ko dekh bahut kush the.

Ravi……..
Bahut hi seedha- sadha vyakti tha. Bachpan kuch khas to nahi tha uska. Panch bahen- bhaiyon me sabse bich ki aulaad tha. Isliye pyar me koi zyada-kam ka naaptol nahi tha. Bade bhaiya ne apne unche mukaam par pahunch kar, zaroor Ravi ki kuch mushkile badha di thi. Hota he, har ghar me comparison hota he. Ravi ke sath bhi yahi tha. Bade bhai ki image ka saya, jija ji ka foreign settlement, jinki naukri usne thukra di thi. Or choti ki shadi ke sath sath babloo ki padhai. Esa nahi tha ke sara bojh sabne Ravi par daal diya ho. Par wo khud hi mann me sare bojh liye chalta tha. Ravi roz ki tarah apni biwi Poonam or bete Shorya se alvida le apni shop ki taraf chal padha.

Rohan bus me bethe bethe vicharon me kho gaya. Darasal, Rohan khud hi ko kho chuka tha, vicharon me khona koi nayi baat nahi thi. Uski college ki shararaton or mastiyon me usne kabhi dhyan hi nahi diya ke baba par ghar ka bojh badhta ja raha he. Baba uski har jayaz- najayaz maang puri karte rahe. Use mehsoos bhi kese hota. Lad-pyar me use kuch dikhta hi nahi. Ek din doston ke sath tafri kar jab ghar pahuncha. Ghar se kuch chillane ki awaazien aa rahi thi. Wo dabe paon ja kar, ghar ki dehleez par khada ho gaya. Baba hath jodd kar kisi ke samne khade the, kareeb kareeb gidgida hi rahe the. Or maa pallu muh par lagaye aansu poche ja rahi thi. Wo admi unchi awaaz me baba se keh gaya tha, “Agle mahine tak dukan ka kiraya nahi diya to dukaan ke sath sath samaan bhi jabt kar lunga.”
Rohan stabdh reh gaya. Us din use hosh aya. Tabhi se naukri ki talaash me nikal gaya tha. Maa- baba ki us haalat ko wo dil par le chuka tha. Ghar ke halaat se wo vakif ho chuka tha. Or khud ko zimmedar man kar, khudko kosta rehta, raato ko rota rehta.
Kuch baate dil par kuch jyada hi asar kar jati he.

Ravi ki choti si sweets ki shop thi. Kuch khas mashhoor to na thi, par itni amdani thi ke Ravi ke pas koi kami nahi thi, siwaye un kuch bojh ke. Shorya ki school fee, rozmarra ki zaroorate puri ho jaya karti thi. Hafte bhar pehle hi usne car khareed li thi. Jispe usne taane bhi sune the.
“Pehle babloo- choti ko dek leta, apne khwaishe to baad me bhi puri kar sakte he.”
Ab Ravi khareedi hui car lauta to nahi sakta tha, or na hi logo ke muh band kar sakta tha. Dukaan par bethe car dekh hi raha tha, ek sajjan uski dukaan par aakar malik ke bare me puchne lage. Kisi bade raies ke bete ki shaadi ke liye yahan se mithaiyan banwani thi. Ravi ko kabhi itna bada consignment nahi mila tha. Aaj to uski khushi ka thikana hi nahi tha. Uski car ko le kar jo baate uthi thi, unko wo ab is consignment se sambhal sakta tha. Uske paas jawab tha. Wo ye khushi sabke sath baantna chahta tha, ya yun kahe ke sabke muh rasgulle se band karna chahta tha.
“Vishnu, me aaj ghar jaldi jaunga, dukaan tu badha dena, or haan 2 kg rasgulle car me rakh dena, Shorya ko bahut pasand he. Me kahin bhool na jaun. Tab tak me pas hi bank ja kar ata hu.”


Rohan bahut ummeedo ke sath office pahuncha tha. Meeting bhi ho chuki thi. Use khud par yakeen tha. Aaj wo haarega nahi. Aaj maa- baba ka wo jhuka sir uncha kar dega. Use maloom nahi tha, uske maa- baba ka sir apne bete ko sahi raste par chalte dekh kar hi uncha ho chuka tha. Meeting ke baad boss ne selected logo ko cabin me bulaya. Promotion Jatin ko mil chuka tha. Rohan ke pairon se jese zameen hatt gayi ho, aasman toot padha ho. Uske to jese zindgi jeene ka maksad hi khatam ho gaya ho. Bahut badi baat nahi thi promotion na milna. Ye nahi to agla mil jata. Rohan ghar ke liye nikal hi raha tha tabhi usne office me uddhti hui afwaah suni. “suna he Jatin boss ki wife ka rishtedaar he koi, isliye use promotion mil gya.”  Ye shabd sun kar to Rohan apni har ummeed chod chuka tha. Pair ghisat te hue sadak par kab agaya use pata hi nahi chala. Uski dhundhli ankho me, saari purani yaadein fir se chalne lagi thi or kadam apne aap age badhe ja rahe the.


Ravi apni car me beth kar ghar jane me hi tha. Tabhi Vishnu 2 kg rasgulle le aya. Ravi ko lag raha tha jese wo kuch bhool raha he. Car ki seat belt lagate lagate usne Vishnu se rasgulle le kar seat par rakh diye or ghar ki aur chal diya. Jo car lene ki khushi zaher ban gayi thi, wo khushi aaj wo rasgulle me dhundhne ja raha tha.

Rohan jab kisi raaste chalte aadmi se takraya to use yaad aya ke wo door nikal aya he. Sadak ke us par se zor se break lagne ki awaaz ayi. “Abey marna he to kisi car ke age kood, scooter ke samne kood kar, kyu gareeb ka khoon pi raha he.”
Ek ladka galti se scooter ke samne agaya tha. Na jane Rohan ke mann me kya aya. Wo samne se aati red car ke age kood gaya. Break lagane ki bahut koshish ki par car Rohan ko takkar marte hue khambe se ja takrayi.
Roahan uchal kar sadak par ja gira or Ravi car ke aage ka kanch toddte hue adha bahar aa chuka tha……..

Rohan ki ankh khuli to wo hospital me tha. Paon me fracture tha or kain choto par patti or bandage lage the. Sir ke sath sath as shareer me bhi dard tha. Sapno ke sath ab haddiyan bhi to tooti thi. Maa- baba pas hi khade the. Maa ke aansu tham nahi rahe the. Tabhi kamre me ek admi aya. Uski shakal bata rahi thi ki usne aansuo ko kese roka hua he. Usne dabi awaaz me kaha tha, “Maaf kar dijiyega, apko takleef hui. Apke hospital ka kharcha hum utha lenge. Mere bhai ki haalat thik nhi. Hum police case ke chakkar me na padhe to acha he.”

Side ke room se cheekhne chillane ki awaaz aane lagi. Wo admi bhagta hua wahan chala gaya. Rohan ne khade hone ki koshish ki to mma ne use uthne nahi diya. Par Rohan ki zidd ke age haar kar baba use sahaara dete hue le gaye. agle kamre me Ravi leta hua tha. Kamre mojood sab ro rahe the. Koi bhagwan ko kos raha tha, koi Rohan ko, or koi us car ko.
Rohan wahin zameen par beth gaya. Usne khudko marne ke chakkar me Ravi ka khoon kar diya tha. Use dikh raha tha. Jese Ravi ki jagah wo leta he or maa- baba ro rahe he, tadap rahe he. Uski aatma kanmp gayi. Wo kya karne ja raha tha. Agar Ravi ki jagah wo hota to….??? Usne kya kar diya tha….
Rohan jeete ji mar gaya tha. Usne Ravi ke parivaar se koi sahaayta nahi li thi, par sachhai bhi kisi ko nahi batayi thi.wo jee kar bhi roz marta tha. Apne us suicide karne ke faisle ko yaad karke.


Life me har koi ek bar suicide karne ki sochta he or kuch to koshish bhi karte he. Par humye bhool jae he ke humare jane ke bad humari family and friends ka kya hoga. marne ke bad sab thik ho jata he, ye sach to nahi.
Me ye nahi kahungi ke suicide karne wale coward hote he. Nahi. Par wo bahaddur bhi nahi hote. Wo zindgi se or khudse itne haar jate he ke khud ko bhi kho dete he. Suicide bahut bada kadam hota he. Ye humare sath dusro ki bhi life ko affect karta he.
It’s a humble request to people…. Please…. Don’t die….
Duniya me kitne hi log he jo har pak jeene ke liye ladte he. Humko mauka mila he jeene ka, marne ka nahi.
Life is precious, don’t lose it. Once gone, it never comes back.